Geneza 38

O Iuda hai e Tamar

1 Ande vremea kodoia,

o Iuda teleardeas katar pe phral

hai oprisailos anda peo drom

hai acilos kă ăk manuș anda o Adulam,

kai buciolas Hira.

2 Othe,

o Iuda dikhleas le ceia le Șuaski,

ăk kanaanițoeski;

lilea la dă romni hai sutos lasa.

3 Oi acilis khamni

hai kerdeas ăk ciavo,

saveske ov ciuteas o anav Er.

4 Pale acilis khamni

hai kerdeas ăk ciavo

saveske oi ciuteas o anav Onan.

5 Pale kerdea ăk ciavo,

saveske oi ciuteas o anav Șela.

Kerdea les ando Kezib.

6 O Iuda lilea pe ciaveske le anglunoske le Eroske

ăk romni po anav Tamar.

7 O Er,

ciavo angluno le Iudasko,

sas nasul angla o Rai,

hai o Rai mudardea les.

8 Atunci o Iuda phendeas le Onanoske:

— Gia ke romni ke phraleski

te avel les ciave ke phrales!^a

9 O Onan,

giandos kă o ciavo kadava

nai te avel lesko,

ciorelas pi sămînța pe phuv

kabor drom sovelas le romneasa pe phraleski,

ta na del ciave pe phrales.

10 So kerelas ov sas nasul angla o Rai,

hai i les mudardea les.

11 Atuncia o Iuda phendea pe boreake le Tamarake:

— Acio phivli ando kher ke dadesko

gi kana va bareola muro ciavo o Șela!

Kă ov gîndisailo kă i o Șela

si te merel sar leske phral.

E Tamar ghelis hai beșlis ando kher pe dadesko.

12 Nakhlos but timpo

hai e cei le Șuaski,

e romni le Iudaski,

mulis.

Pala so nakhles ăl ghesa le jaleake,

o Iuda uștilos ke Timna,

kolende kai tunzilas le brakhean hai le buznean,

ov hai lesko amal,

o Hira anda o Adulam.

13 Phendineailos le Tamarake:

— Dikh,

keo sokro uștel ke Timna,

kaște tunzil le brakhean hai le buznean.

14 Atuncia oi ciudeas pe țoale le phivlimaske,

uciardilis ăk bazmavasa hai hureadilis,

hai beșlis ke poarta le Enaiimoski

kai si po drom karing e Timna;

kă dikhleas kă o Șela kerdilos baro,

hai oi ni sas leske dini dă romni.

15 O Iuda dikhlea lan hai gîndisailo

kă si ăk kurva,

kă uciardeas peo mui.

16 Oprisailo late anda peo drom

hai phendeas:

— Muk man te sovav tusa!

Kă ni pringiandea lan

kă sas leski bori.

Oi phendeas:

— So des man te soves manța?

—

17 Si te dav tuke drom ăk iedo anda muro kîrdo.

— Numa kana mukesa manghe gajo

gi kana des les drom.

—

18 So gajo te dav tut?

— Keo sigilo pe doreasa

hai e rovli kai si tut ando vast.

Ov dinea len lake.

Pala kodoia sutos lasa,

hai oi acilis khamni lestar.

19 Oi uștilis hai teleardeas.

Ciudeas e bazmava

hai hureadilis pale andăl țoale le phivlimaske.

20 O Iuda dineas drom le iedos

pă peo amal anda o Adulam,

kaște înkalavel o gajo andal vast le romneake.

Dar ov ni arakhlea lan.

21 Pușleas le manușăn le thaneske:

— Kai si e kurva kai beșelas kate ko Enaim,

po drom?

On dine les anglal:

— Nas nici ăk kurva kate.

22 Ov boldineailos ko Iuda hai phendea leske:

— Ni arakhlem lan,

hai ăl manuș le thaneske phendes:

‘Nas nici ăk kurva kate.’

23 O Iuda phendeas:

— Te înkearel so lileas,

numa ta na kerdeos lagiaveske.

Dikh,

dinem drom o iedo kadava,

hai ni arakhlean lan.

24 Kam pala trin cion phendilos le Iudaske:

— E Tamar,

ki bori kurvisardeas hai dikh,

acili khamni păce kurvisardeas.

Hai o Iuda phendeas:

— Înkalaven lan avri te avel phabardi!

25 Kana înghearenas lan,

oi dinea drom te phenen lake sokroske:

— Katar o manuș

kaske si ăl bukea kadala,

acilem me khamni.

Dikh,

rughiv tut,

kasko si o sigilo kadava,

e dori kadaia hai kaia rovli?

26 O Iuda pringiandea len hai phendeas:

— Si mai ciacii dă sar mande,

kă ni dinem la dă romni

mîră ciaveske le Șelaske.

Dă atunci ni mai sutos lasa.

27 Kana avilis e vremea te kerel,

dikh,

andă lako păr sas dui ciave.

28 Ando timpo le kerimasko,

iekh înkaladeas o vast anglal.

E moașa lilea lesko vast

hai phanglea les ăk thavesa lolo,

phenindos:

— Kadava înklistos anglal.

29 Dar kana ov țîrdelas o vast palpale,

înklisto lesko phral.

Atunci e moașa phendeas:

— So pharaiimos kerdean!

Kodolaske lesko anav sas ciutino Pereț.^b

30 Palal înklisto lesko phral,

saves sas les o thav lolo ko vast,

hai lesko anav sas ciutino Zerah.