O Isus, Rai le Sabatosco
Ăl ucenicea paghen spicea ando ghes le Sabatosco
6
1 Andăc ghes Sabatosco,
o Isus nachelas andal cîmpuri le ghivesche.
Lesche ucenicea paghenas spicea ghivesche,
marenas len andăl vast hai hanas.
2 Niște fariseia phendes:
— Soste cheren so ni trăbul ando ghes le Sabatosco?
3 O Isus dinea len anglal:
— Ni cetisarden so cherdeas o David cana bochailos,
ov hai cola cai sas lesa?
4 Sar întrisailos ando cher le Devlesco,
lileas ăl marne cai ciunas pes angla o Rai,
haleas anda lende
hai dineas i colen cai sas lesa,
ăl marne cai nas len voia te han len numa ăl rașaia.
5 Hai phenelas lenghe:
— O Ciavo le Manușăsco si o Rai le Sabatosco.
O Isus sastearel ăc manuș vastesa paralizime
6 Andă aver ghes Sabatosco,
o Isus întrisailos ande sinagoga hai sicavelas.
Othe sas ăc manuș
savesche o vast o ciacio sas paralizime.
7 Ăl sicaiitorea le Crisache hai ăl fariseia vardinas co Isus
te dichen cana va sastearela ando ghes le Sabatosco,
caște daștin te phenen că cherdeas daiicii contra le Crisachi.
8 Ov pringianelas lenghe gînduri,
dar phendeas le manușăsche cai sas les o vast paralizime:
— Uști hai beș ando mașcar!
— Puciav tumen:
ando ghes dă Sabat so muchel e Cris te cheres?
Te cheres mișto sau nasul?
Te hastraves ăc viața sau te distrugis lan?
10 Atunci vardisardeas pă sea andă pe riga
hai phendeas le manușăsche:
— Întinzosar cheo vast!
Ov întinzosardea les hai lesco vast sastilos.
11 Dar on holeaile nasul
hai denas duma mașcar peste so te cheren le Isusosche.
O Isus alol le deșuduien apostolea
12 Andăl ghesa codola,
o Isus ghelos po plai te rughil pes,
hai nachadea saorî reat rughindos pes le Devlesche.
13 Cana parnilos,
dinea mui pe ucenicen
hai alosardeas deșudui anda lende,
savenghe phendea lenghe i apostolea:
14 le Simonos,
savesche phendeas i Petru,
le Andreies,
o phral le Petresco,
le Iacovos,
le Ioanos,
le Filipos,
le Bartolomeeos,
15 le Mateeos,
le Tomas,
le Iacovos le Alfeeosco,
le Simonos,
savesche mai phendeol Zeloto,a
16 le Iudas le Iacovosco
hai le Iudas Iscarioteano,
savo mai tîrzio bichinel le Isusos.
O Isus sicavel le manușănghe sar te aven lesche ucenicea
O Isus sastearel but manuș
17 O Isus muclea pes lența hai oprisailos andăc than orta.
Othe sas but ucenicea anda lesche
hai but manuș cai avilesas anda saorî Iudeea,
anda o Ierusalimo hai pașă catar o Tir hai o Sidon,
pașai marea.
Aviles caște așunen les
hai te aven sastearde catar lenghe nasfalimata.
18 Cola chinuiime catar ăl duhuri nasul sas sastearde.
19 Hai saoră lumea rodenas te machen pes lestar,
că anda leste înclelas ăc zuralimos
savo sastearelas saorăn.
Con si bahtale
20 O Isus dichleas orta pă pe ucenicea hai phendeas:
— Bahtale sen tume ăl cioră,
că o thagarimos le Devlesco si tumaro!
21 Bahtale sen tume,
save sen bochale acanac,
că si te aven ciailearde!
Bahtale sen tume save roven acanac,
că va asana!
22 Bahtale sen tume,
cana ăl manuș uron tumen,
gonin tumen,
batjocorin tumen
hai va ciudena tumare anava sar nasulimos
andai cauza le Ciaveschi le Manușăsco!
23 Ando ghes codova bucurin tumen hai huten dă veselie,
că dich,
tumari pochin si bari ando ceri!
Mai anglal,
sa cadea phiradiles ăl dada cadal manușănghe le proorocența.
24 Dar,
vai tumendar,
bravale,
că primisarden deja saoră lacimos!
25 Vai tumendar,
save acanac sen ciaile,
că va bochaona!
Vai tumendar save acanac asan,
că va avena triști hai va rovena!
26 Vai tumendar,
cana saoră manuș lăudin tumen,
că sa cadea cherenas ăl dada cadal manușănghe
le proorocența ohamne!
Iubisar che dușmanos!
27 Dar tumenghe,
save așunen man,
phenav tumenghe:
Iubin tumare dușmaen!
Cheren mișto colenghe cai uron tumen!
28 Binecuvintin colen cai den tumen armaia!
Rughin tumen anda cola cai phiradeon nasul tumența!
29 Cana daconiva del tut dab păc rig le moschi,
bolde i coiaver rig!
Hai cana daconiva lel chi haina,
muc les te lel i cheo gad!
30 Coles cai manghel tuche,
de les,
hai cana daconiva lel che buchea,
na mang le palpale!
31 So camen ca ăl manuș te cheren tumenghe,
sa cadea cheren lenghe i tume!
32 Cana iubin colen cai iubin tumen,
so lauda te primin?
I ăl bezehale iubin colen cai iubin len.
33 Hai cana cheren mișto colenghe cai cheren tumenghe mișto,
so lauda te primin?
I ăl bezehale cheren sa cadea.
34 Hai cana den ugile colen catar pachean că len palpale,
so lauda te primin?
I ăl bezehale den ugile le bezehalen,
caște primin palpale sa pe love.
35 Dar tume te iubin tumare dușmaen,
cheren mișto hai den ugile
hai na ajuchearen te len palpale!
Hai tumari pochin va avela bari
hai va avena ăl ciave le mai Bare Devlesche,
că ov si lacio colența cai ni nain lesche
hai le nasulența.
36 Aven pherde mila sar i tumaro Dad si pherdo mila!
Na crison avren!
37 Na crison,
hai nai te aven crisome,
na cheren doșale,
hai nai te cherdeon doșale,
iertin,
hai va iertila pes tumenghe!
38 Den,
hai va dela pes tumenghe!
Va ciula pes andă tumaro gono ăc măsura lacii,
mardi,
mișchime,
cadichi dă but,
că va dela opral.
Că so măsurasa măsurin,
va măsurila pes i tumenghe.
39 Phendea lenghe i ăc pilda:
— Daștil ăc coro te sicavel o drom avre corăsche?
Ni va perena ăl dui ande groapa?
40 O ucenico nai mai baro dă sar peo sicaiitori,
dar orso ucenico sicado mișto
va avela sar peo sicaiitori.
41 Soste diches e așchia andai iach che phraleschi,
dar ni diches e grinda anda chi iach?
42 Sar daștis te phenes che phralesche:
«Phrala,
muc man te încalavav e așchia anda chi iach»,
cana tu ni diches e grinda anda chi iach?
Fățarnicona,
mai anglal încal e grinda anda chi iach,
hai atunci va dichesa mișto
te încalaves e așchia andai iach che phraleschi!
O pomo hai e roada
43 Nici ăc pomo lacio ni cherel roade nasul,
hai nici ăc pomo nasul ni cherel roade lace.
44 Că fiosavo pomo pringiandeol pala peo rodo.
Că ni chidel pes smochinea andal carne,
nici ni chidel pes drach andal stufișe carnale.
45 O manuș o lacio încalavel buchea lace
andai visteria lacii pe ileschi,
hai o manuș o nasul încalavel buchea nasul
andai visteria nasul pe ileschi,
că o mui del duma anda so pherel cheo ilo.
Chera vazdine pe stînca hai po chișai
46 Soste phenen manghe:
«Raia,
raia!»,
hai ni cheren so me phenav?
47 Va sicavava tumenghe sosa ameal orso manuș
cai avel mande,
așunel mîră vorbe hai cherel len.
48 Ameal ăc manușăsa savo cana vazdeas ăc cher,
hanadeas adînco hai ciuteas e fundația pe stînca.
Cana aviles ăl paia zurales po cher codova,
ni daștisailes te mișchin les,
că sas mișto cherdo.
49 Dar con așunel hai ni cherel so phenav,
ameal ăc manușăsa
savo vazdeas ăc cher pe phuv bi fundațiaco.
Hai aviles zuralimasa ăl paia po cher codova,
hai ov sigo pelos,
hai anda leste ni aciol numa ăc grămada phuiachi.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)