O salmo 139
O Del pringianel sea so si ando manuș
Caring o mai baro le muzicanțengo. Ăc ghili le Davidoschi.
1 Raia,
tu rodean andă muro ilo,
hai pringianes man,
2 gianes cana beșav tele hai cana ușteav,
hai dural hacheares muro gîndo.
3 Mișto diches cana phirav hai cana sovav,
hai pringianes saoră droma mîră.
4 Ciaces,
gi cai te aresel e vorba pă mîrî cib,
hai dich,
Raia,
că pringianes lan andă sea.
5 Tu înconjuris man anglal hai palal,
hai cius cheo vast pă ma.
6 Ăc gianimos cadalestar si but minunime anda mande,
si cadichi dă baro,
că ni daștiv te hachearav les.
7 Cai daștivas te giav catar cheo Duho?
Cai daștivas te nașav tutar?
8 Te afi ușteavas ando ceri,
tu san othe.
Te afi sovavas ando cher le mulengo,
ita tu san i othe.
9 Te afi hureavas caring o răsărimos,
sau te afi beșavas că coiaver rig le mareachi,
10 i othe cheo vast afi phiravelas man,
cheo vast o ciacio afi închearelas man.
11 Te afi phenavas:
„Ciaces o tunearico va uciarela man,
e lumina andă muro juro va cherdola reat!”
12 Dar nici o tunearico nai calo anda tute,
hai e reat strălucil sar o ghes.
O tunearico si sar e lumina anda tute.
13 Căci tu cherdean saoră riga cai si andă mande,
tu chubdean man andăl pîntecea mîră dache.
14 Lăudiv tut,
că sem cherdo cadea dă uimime hai minunime!
Minunime si che buchea,
hai muro ilo gianel mișto e buchi cadaia!
15 Mîră cocalea nas garade tutar cana semas cherdo andăc than garado.
Cana semas subdo sar ando adînco le phuiaco,
16 Che iacha dichle man gi cai te cherdeov.
Andă cheo lil sas ramome saoră ghesa cai sas hotărîme anda mande,
cana nas nici iech anda lende.
17 Cabor de cuci si anda mande che gînduri,
Devla!
Hai cabor dă but si!
18 Te afi ghinavas len,
afi sas mai but de sar o chișai.
Cana ușteav,
sem sa tusa.
19 O,
Devla!
Te mudaresa colen cai cheren nasul!
Dureon mandar,
manuș ratesche,
20 cola cai phenen buchea nasul anda tute!
Che dușmaia phenen cheo anav caște cheren nasul!
21 Ciaces,
ni urov me,
Raia,
colen cai uron tut?
Hai nai manghe scîrba catar cola cai vazden pes chi contra?
22 Da,
urov len ăc urasa anda saoro ilo muro,
cherdiles mîră dușmaia.
23 Dich andă ma,
Devla,
hai pringian muro ilo!
Ciu ma che proba hai pringian mîră gînduri cai închearen man!
24 Dich cana sem păc drom caring o bezeh
hai înghear man po drom le veșniciaco!
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)