🏠 <     Alfabeto le literasa „c”     Alfabeto le literasa „k”
  <     Ʒeneza     12     >  
O Raj del muj k-o Avram
12
1 O Raj phendǎ le Avramosqe:
— Ïnkli anθa kiro them,
anθa kiri familia,
anθa o kher ke dadesqo,
haj ʒa anθ-o them
kaj si te sikavav les tuqe!
2 Haj si te kerav anθa tuθe äk njamo baro,
si te binekuvintiv tut,
kerav baro kǒ anav,
haj si te aves äk binekuvïntarǎ.
3 Si te binekuvintiv kolen kaj binekuvintin tut,
kolen kaj del tut armaja si te dav len armaja.
Anθä tuθe si te aven binekuvintime
saorä njamuri pa-i phuv.
4 O Avram ïnklisto sar phendǎ lesqe o Raj,
haj o Lot gelo leça.
Le Avramos sas jeftadeśa haj panʒ bärś
kana ïnklisto anθa o Haran.
5 O Avram lilǎ le Saraja pe rromnǎ,
haj pe phralesqe ćhaves o Lot,
haj sǎ lenqo bravalimos
kaj kide les,
haj i le manuśän kaj lile len on anθ-o Haran.
Haj ïnkliste te ʒan anθ-o Them Kanaan,
haj aresle anθ-o Them Kanaan.
6 O Avram nakhlos anθa o them
ʒi k-o foro Sihem,
k-o steźari baro le Moresqo.
Äl kanaanicǎ sas anθ-o them.
7 O Raj sikadilos le Avramosqe haj phendǎs:
— O them kadava si te dav les ke ćhavenqea.
O Avram kerdǎs äk altari le Rajesqe
kaj sikadilos lesqe.
8 Haj othar telǎrdes k-o plaj
karing o esto le Betelosqo.
Haj ov vazdǎs pǒ korto:
karing o foro Betel perel o kham,
karing o foro Aj ïnklel o kham.
Othe vazdǎs äk altari le Rajesqe,
haj dǎ muj k-o Raj pä lesqo anav.
9 O Avram ʒalas angle,
karing o sudo.
O Avram darajlo anθ-o Eʒipto
10 Haj sas bokh anθ-o them.
O Avram gelos anθ-o Eʒipto
te beśel äk timpo othe,
kä e bokh sas bari anθ-o them.
11 Haj kana sas paśä te aresel anθ-o Eʒipto,
pe rromnǎqe le Sarajaqe phendǎs:
— Akanak dikh!
Me ʒanav kä tu san äk ʒuvli śukar k-o muj.
12 Kana dikhena tut äl eʒipteǎ,
si te phenen:
«Kadaja si lesqi rromni.»
Haj si te mudaren man,
haj tut si te muken tut te trais.
13 Rugiv man tuθe,
phen kä san mïrï phej!
Anθa tuθe te ʒal manqe miśto,
haj muro ilo te aćhol ʒuvindo!
14 Haj kadǎ sas,
kana ćhutǎ pe o Avram anθ-o Eʒipto,
äl eʒipteǎ dikhle
kä e ʒuvli si but śukar.
15 Kana lan dikhle lan äl manuś le thagaresqe,
läudisarde lan k-o thagar,
haj e ʒuvli sas andini anθ-o kher le thagaresqo.
16 Le Avramosqe kerde lesqe but miśtimos
anθa laqi kauza.
Les dinǎ les brakhǎ,
guruva,
xära,
robi haj roabe,
xärnǎ haj kämile.
17 O Raj dǎ le dab bare nasulimatença
le thagares haj lesqe kheres
anθa-i kauza le Sarajaqi,
e rromni le Avramosqi.
18 Haj o thagar dinǎs muj le Avramos
haj phendǎs:
— So kerdǎn manqe?
Sosθe ni phendǎn manqe kä si ki rromni?
19 Sosθe phendǎn kä si ki phej?
Haj me lem lan dä rromni.
Akanak dikh ke rromnǎ,
le lan haj telar!
20 Haj o thagar porunćisardǎs pe manuśänqe
te nakhaven les,
lesqe rromnǎ
haj sǎ so sas les.