E Rut
1
Keo Del si muro Del
1 Andăl ghesa kana sas bulibașa ăl krisitorea, kerdilis bokh ando them. Atunci ăk manuș anda o Betleemo andai Iuda ghelos te beșel andăl thana orta le Themoske Moab sar străiino, ov, leski romni hai leske dui ciave. 2 O anav le manușăsko sas Elimelek, o anav leske romneako sas Naomi, hai o anav leske ciavengo sas Mahlon hai Kilion: sas efratițea anda o Betleemo andai Iuda. Kana aresles andăl thana orta le Themoske Moab, aciles othe.
3 Pala kodoia o Elimelek, o rom le Naomeako mulos, hai oi acilis pe duie ciavența. 4 On lile peske romnea moabite. Iekh buciolas Orpa hai koiaver Rut, hai beșles othe pașal deș bărș. 5 O Mahlon hai o Kilion mules i on ăl dui, hai e giuvli acilis bi pe duie ciavengo hai bi romesko.
6 Pala kodoia uștilis oi hai lake borea kaște ril pes andă peo them andal thana orta le Themoske Moab. Kă othe ando Moab așundeasas kă o Rai dikhleas pe poporos hai dineasas les marno. 7 Oi înklistis anda o than andă savo beșelas hai teleardeas pe duie boreanța te ril pes ando them le Iudasko. 8 Atunci e Naomi phendeas pe duie boreanghe:
— Gian, hai rin tumen fiosavi ko kher pe dako! O Rai te phiradeol miștimasa tumența, kadea sar phiradilen i tume kolența kai mules, hai i manța! 9 O Rai te kerel tumen te arakhen odihna fiosavi ando kher pe romesko!
Hai ciumidea len.
On vazdes o glaso hai ruies 10 hai phendes lake:
— Na, si te ris amen tusa kă keo poporo!
11 Dar e Naomi phendeas:
— Rin tumen, mîră ceia, soste te gian tume manța? Ciaces mai si man ciave andă mîră pîntecea te daștin te aven tumare roma? 12 Rin tumen, mîră ceia, hai gian tumenghe! Me sem but phuri kaște mai avav romni romeski. Kear te pakeavas kă mai daștiv te avav romni ăk romeski ande reat kadaia hai te kerav ciave, 13 ajukearenas len tume gi kana bareonas? Acionas tume korkoro anda lende hai ni lenas tumenghe rom? Na, mîră ceia! Mîrî viața si mai kerki dă sar tumari, kă o vast le Raiesko mardea man!
14 Hai on vazdes o glaso hai pale ruies.
E Orpa ciumideas pe soakra hai teleardeas, dar e Rut lilea lan ande angali. 15 E Naomi phendeas:
— Ita, ki kumnata risailis kă peo poporo hai kă pe devla: risao pala ki kumnata!
16 Dar e Rut phendea lake:
— Na înkear te mukav tut, te riv man tutar! Kai va giasa tu, va giava i me, kai va rakearesa tu, va rakearava i me. Keo poporo si i muro poporo, keo Del si i muro Del. 17 Kai va meresa tu, si te merav i me, hai othe si te avav prahome. Kadea te kerel manghe o Rai, hai i mai nasul, kana aver daiicii dekît o mulimos va despărțila man tutar!
18 Kana e Naomi dikhleas kă oi kamel te gial lasa, ni mai phendeas lake te ril pes.
19 Phirdes on ăl dui hai aresles ko Betleemo. Hai kana aresles ando Betleemo, saoro foro începosailos te del pes duma anda lenghi kauza, hai ăl giuvlea phenenas:
— Kadaia si e Naomi?
20 Oi phendea lenghe:
— Na mai phenen manghe Naomi! Phenen manghe Mara,* Naomi hakeardeol ande cib le evreenghi „plăkuto”, hai Mara hakeardeol „kerkimos”. kă o Del o Mai Zuralo kerdea mîrî viața but kerki. 21 Pherdi teleardem, hai nanghi anel man palpale o Rai. Soste te mai phenen manghe Naomi, kana o Rai si mîrî kontra hai o Del o mai Zuralo andineas o nasulimos pă ma?
22 Kadea risailis e Naomi hai e Rut e moabita, laki bori, savi risailis lasa andal thana orta le Themoske Moab. Aresles ko Betleemo ko începuto le secerimasko le orzosko.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.