1 Mașcar ăl fariseia sas ăc manuș cai buciolas Nicodim, ăc baro le evreengo. 2 Ov avilos e reat co Isus hai phendea lesche:

— Rabi, gianas că san ăc sicaiitori avilo catar o Del, că coniva ni daștil te cherel ăl semnea cadala cai cheres len tu, cana nai o Del lesa.

3 O Isus dinea les anglal:

— Ciaces, ciaces phenav tuche: cana ăc manuș ni cherdeol pale* Ando originalo, „cherdeol pale” mai daștil te hacheardeol „cherdeol opral”, anda o Del., ni daștil te dichel o Thagarimos le Devlesco.

4 O Nicodim phendea lesche:

— Sar daștil te cherdeol ăc manuș phuro? Daștil ov te ciul pes pale ando păr pe daco hai te cherdeol?

5 O Isus dinea les anglal:

— Ciaces, ciaces phenav tuche: cana daconiva ni cherdeol anda o pai hai anda o Duho, ni daștil te gial ando Thagarimos le Devlesco. 6 So cherdeol anda o trupo, si trupo, hai so cherdeol anda o Duho, si duho. 7 Na mirisavo că phendem tuche: trăbul te cherdeon tumen pale. 8 E braval phurdel cai camel hai așunes laco phurdimos, dar ni gianes catar avel hai nici cai gial. Sa cadea si saorănța cai sas cherde anda o Duho.

9 O Nicodim phendea lesche:

— Sar daștil te cherdeol cadea daicii?

10 O Isus dinea les anglal:

— Tu san sicaiitori le Israelosco hai ni hacheares cadal buchea? 11 Ciaces, ciaces phenav tuche, că ame phenas so gianas, hai phenas o ciacimos anda so dichleam, hai tume ni pachean amari mărturia. 12 Cana ăl buchea le phuiache phendem len tumenghe hai ni pacheaien, sar va pacheana cana va phenava tumenghe ăl buchea le cerosche? 13 Coniva ni uștilos ando ceri, numa cova savo muclea pes tele anda o ceri, o Ciavo le Manușăsco. 14 Hai cadea sar vazdeas o Moisea o sap ⸤păc cașt⸥ ande mulani,a Numerea 21:9 sa cadea trăbul te avel vazdino o Ciavo le Manușăsco, 15 ca orsavo pacheala andă leste, te avel les viața veșnico.

16 Că cadea iubisardeas o Del e lumea, că dineas pe corcoro ciaves, ca orcon pacheala andă leste, ta na hasaol, dar te avel les viața veșnico. 17 Că o Del ni dineas drom pe ciaves andă cadai lumea te crisol e lumea, dar te avel hastrame e lumea prin leste. 18 Con pacheal andă leste nai crisome, dar con ni pacheal si deja crisome, că ni pacheaias ando anav le corcoro ciavesco le Devlesco. 19 Codolasche si e cris cadaia: e lumina avilis ande lumea, hai ăl manuș iubisardes mai but o întunearico dă sar e lumina, că lenghe fapte sas nasul. 20 Că orcon cherel nasul urol e lumina, hai ni avel ch-e lumina, ta na dicheol lesche fapte. 21 Dar con cherel o ciacimos avel ch-e lumina, caște dicheol lesche fapte, că si cherde zuralimasa catar o Del.

22 Pala codoia o Isus hai lesche ucenicea gheles păl gava le Iudeiache, hai othe beșelas lența hai bolelas. 23 I o Ioan bolelas, ando Enon pașa o Salim, că othe sas but pai hai ăl manuș avenas hai bolenas pes. 24 Că o Ioan nas încă phandado ande temnița. 25 Atunci ăl ucenicea le Ioanosche hale pes ăc evreeosa andal obiceiuri le thovimasche. 26 Hai aviles co Ioan hai phende lesche:

— Rabi, cova cai sas tusa închealtar o Iordano hai anda savo dean duma cadea dă șucar, dich, ov bolel hai saoră manuș gian leste.

27 O Ioan phendeas:

— Ăc manuș ni daștil te primil chanci, cana ni sas lesche dino anda o ceri. 28 Tume senas othe martor cana phendem: «Me ni sem o Cristos, dar me sem dino drom angla leste.» 29 Cas si les mireasa si ginero, dar o amal le ginerosco, cai beșel hai așunel le gineros, bucuril pes but catar lesco glaso. Cadea că cadai bucuria mîrî pherdineailis. 30 Ov trăbul te bareol hai me te țîinov.

31 Cova cai avel opral si mai opre dă sea. Cova cai si pa-i phuv si phuiaco hai del duma sar pa-i phuv. Cova cai avel anda o ceri si mai opre dă sea. 32 Ov phenel o ciacimos anda so dichleas hai anda so așundeas, dar coniva ni așunel catar leschi mărturia. 33 Con așundeas catar leschi mărturia pecetuil că o Del si ciacio. 34 Că cova cai dinea les drom o Del, phenel ăl vorbe le Devlesche, anda codoia că o Del ni del les o Duho le măsurasa. 35 O Dad iubil le Ciaves, hai saoră buchea dinea len andă lesco vast. 36 Con pacheal ando Ciavo, si les viața veșnico, dar con ni așunel catar o Ciavo, ni va dichela viața hai e holi le Devleschi aciol pă leste.