1 Phendem tumenghe cadal buchea caște na peren. 2 Va dena tumen avri andal sinagogi. Hai mai but dă cadichita, va avela timpo ca orcon va mudarela tumen va gîndila că cherel ăc buchi cai camela o Del. 3 Va cherena cadal buchea anda codoia, că ni pringiandes le Dades hai nici man. 4 Dar me phendem tumenghe cadala ca atuncia cana va avela o timpo te cherdeol, te anen tumenghe goghi că phendem len tumenghe. Ni phendem len tumenghe dă anglal, că semas tumența.

— 5 Dar acanac giav coleste cai dinea man drom hai nici iech anda tumende ni pucel man: «Cai gias?» 6 Anda codoia că phendem tumenghe cadal buchea, tumare ile pherdile tristețea. 7 Dar ciaces phenav tumenghe: Si mai mișto anda tumende ca me te telearav. Că cana me ni telearava, o Ajutori ni va avela tumende. Dar cana telearava, va dava les tumenghe drom. 8 Hai cana va avela ov, va sicavela le lumeache că nai lan ciacimos andă soste si o bezeh, o ciacimos hai o crisimos. 9 Andă soste si o bezeh, că on ni pachean andă mande; 10 andă soste si o ciacimos, că giav că muro Dad hai tume ni mai dichen man; 11 hai andă soste si o crisimos, că o mai baro cadal lumeaco si crisome andai doș.

12 Mai si man but te phenav tumenghe, dar acanac ni daștin te înghearen len. 13 Dar cana avel ov, o Duho le Ciacimasco, va phiravela tumen că saoro ciacimos. Că ni va dela duma pestar, hai va phenela numa so așunel mandar, hai va phenela tumenghe so si te avel. 14 Ov va sicavela cabor sem dă baro, că va lela so me phenav hai va phenela tumenghe. 15 Sea so si le Dades si muro, codolasche phendem că lel so me phenav hai va phenela tumenghe.

— 16 Țîra timpo hai ni mai dichen man. Hai pale țîra timpo hai va dichena man.

17 Atunci andal lesche ucenicea phendes mașcar peste:

— So camel te phenel amenghe cadalasa: «Țîra timpo hai ni mai dichen man. Hai pale țîra timpo hai va dichena man»? Hai că «giav co Dad»?

18 Anda codoia on phenenas:

— So si cadala so phenel: «Ăc țîra timpo»? Ni gianas so camel te phenel.

19 O Isus gianelas că camenas te pucen les hai pușlea len:

— Codolasche pucen tumen mașcar tumende că phendem: «Țîra timpo hai ni mai dichen man. Hai pale țîra timpo hai va dichena man»? 20 Ciaces, ciaces phenav tumenghe că tume va rovena hai va jelina, dar e lumea va bucurila pes. Hai va necăjina tumen, dar tumaro necăjimos va cherdeola bucuria. 21 E giuvli, cana si lan ăl ducha le cherimasche, necăjil pes, că avilos laco timpo te cherel. Dar pala so oi cherdeas le ciaves, bistrel e duch bucuriatar că cherdilos ăc manuș ande lumea. 22 Cadea i tume necăjin tume acanac, dar pale va dichava tumen. Hai tumaro ilo va bucurila pes, hai coniva ni va daștila te ciorel tumari bucuria. 23 Ando ghes codova nai te mai pucen man chanci.

Ciaces, ciaces phenav tumenghe: orso va manghena catar o Dad andă muro anav, ov va dela tumen. 24 Gi acanac ni manglen chanci andă muro anav. Manghen hai va dela pes tumenghe, ca tumari bucuria te avel pherdi!

25 Phendem tumenghe cadal buchea andă pilde. Dar avel o timpo cana ni va mai dava duma tumenghe andă pilde hai va dava tumenghe duma mișto anda o Dad. 26 Ando ghes codova, va manghena andă muro anav. Hai me phenav tumenghe că ni mai trăbul te rughiv me le Dades anda tumende. 27 Că chear o Dad iubil tumen, anda codoia că tume iubin man hai pachean că me avilem catar o Del. 28 Înclistem catar o Dad hai avilem ande lumea. Pale mucav e lumea hai giav co Dad.

29 Lesche ucenicea phendes:

— Dich, acanac des duma mișto, hai ni mai phenes nici ăc pilda. 30 Acanac gianas că tu pringianes sea hai că nai tut nevoia te pucel tut daconiva. Codolasche pacheas că avilean catar o Del.* Ando verseto 30 ăl ucenicea pringiandes că ov giangleas mai anglal so on camnes te pucen les ando verseto 17. Hai numa o Del gianel so gîndil o manuș. Ioan 2:24-25.

31 O Isus dinea len anglal:

— Acanac pachean? 32 Așunen, avel o timpo hai acanac avilos, cana fiosavo anda tumende va nașăna că tumare chera hai va muchena man corcoro. Dar me ni sem corcoro, că o Dad si manța. 33 Phendem tumenghe cadala caște avel tumen pacea andă mande. Ande lumea va avela tumen necazuri, dar na daran, me biruiisardem e lumea.