O salmo 101
Sar trăbul te avel o guverno ando foro le Raiesko?
Ăk ghili le Davidoski
1 Mîrî ghili te avel anda o miștimos hai o ciacimos,
tuke,
Raia,
va ghilabava tuke.
2 Si te phiradeov gogheasa păk drom bidoșako.
Kana va avesa mande?
Va phiradova le ilesa ujo
andă muro kher.
3 Nai te ciav angla mîră iakha khanci
kai si khancesko.
Urov ăl fapte kolenghe kai bolden ăl zeia le Devleske:
on ni va lipina pes mandar!
4 O ilo kerno de rimome si te goniv les,
ni kamav te avel man khanci le nasulimasa.
5 Kolen kai den duma dă nasul garade avren
va phandavava lengo mui,
kolen kai dikhen opral hai si lengo ilo îngîmfome,
va dava len avri.
6 Va alova manuș pakeamaske anda o them
kaște aven pașa mande,
numa kola kai phiren păk drom ujo,
on va slujina manghe.
7 Kola kai tharen
ni va beșena andă muro kher,
kola kai hohaven
ni va aciona angla ma.
8 Andă fiosavi deteherin kana krisov
va phandavava o mui
saorăngo kai keren nasul ando them,
kaște hastrav anda o foro le Raiesko
saorăndar kai keren bezeh.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)