🏠 <     Alfabeto le literasa „c”     Alfabeto le literasa „k”
  <     Galateni     1     >  
O lil karing äl galateni
O saluto le Pavelosqo
1
1 O Pavelo kerdo apostolo,
na kaθar äl manuś,
haj nić ni sikadǎs man dak manuś,
numa o Isus Kristos,
haj o Del o Dad,
kaj vazdǎs les anθa äl mule,
2 haj saorä phral kaj si mança:
karing äl khangerǎ anθa-i Galacia.
3 O miśtimos haj e paćja tumenqe
kaθar o Del amaro Dad
haj kaθar o Raj o Isus Kristos!
4 Ov dinǎs pes anθa amare bezexa
te xastravel amen
anθa kala nasul ʒungale bärśa,
sar kamnos o Del amaro Dad.
5 Lesqe si o barimos
akanak haj orkana.
Amin.
Naj aver evangelia
6 Miriv man kabor dä sigo
durǒn kaθar Kova kaj dinǎs tumen muj
anθ-o miśtimos le Kristososqo
kä aver evangelia
7 kaj naj ćaći.
Numa kä si manuś kaj rimon tumen
haj kamen te paruen e evangelia le Kristososqi.
8 Dar kana ame sau äk ïnʒero anθa o ćeri
te avela te phenel tumenqe aver evangelia
de sar kaj ame phendǎm lan,
te avel dino armaja pentru totdjauna.a
9 Sar phendǎm maj anglal,
pale phenav akanak:
„Kana dakoniva phenela tumenqe aver evangelia
kaj ni avela sar koja kaj lilen lan,
te avel dino armaja pentru totdjauna.”
O Pavelo sas kerdo apostolo kaθar o Kristos
10 Akanak kamav
ka äl manuś te phenen dä miśto anθa manθe
sau o Del?
Sau rodav me te plaćov le manuśän?
Kana maj rodava te plaćov le manuśän,
ni maj sem o robo le Kristososqo.
11 Phralaǃle haj phejaǃle,
kamav te ʒanen kä e evangelia
kaj me dav la duma,
naj kaθar äl manuś,
12 kä ni lilem lan
haj nić ni sikilem lan manuśäsθar,
dar sikadilos manqe o Isus Kristos.
13 Kä aśunden so keravas me maj anglal,
kana pakǎvas anθ-e reliʒa le judeěnqi.
Sar keravas baro nasulimos
haj phandavas le khangerǎ le Devlesqi
te stïrpiv lan.
14 Barǒvas anθ-e reliʒia le judeěnqi
maj but de sar kola kaj sas mança
anθ-äl bärśa
haj anθ-o muro nǎmo.
Haj kamnem te ćhav saorä ilo
te kerav äl obićeǎ mïrä phurenqe.
15 Dar o Del ćhutǎ man rigaθe
dä kana semas anθ-o pär mïrä daqo,
haj dinǎ man muj anθä pǒ miśtimos,
16 pentrukä
ov kamnos te sikavel manqe pe Ćhaves,
me te phenav avre nǎmurenqe anθa lesθe.
Atunć ni beślem
te dav duma nić äk manuśäça,
17 nić ni gelem anθ-o Jerusalimo
kolenθe kaj sas apostolǎ maj anglal manθar.
Sigo telǎrdem anθ-e Arabia,
haj boldinǎjlem palpale anθ-o Damasko.
18 Pala trin bärś uśtilem anθ-o Jerusalimo
te prinʒanav le Kifas
b haj aćhilem lesθe deśupanʒ ges.
19 Dar ni dikhlem nić jekhes
anθa-l kolaver apostolǎ,
numa le Jakovos, o phral le Rajesqo.
20 Anθä so ramov tumenqe,
dikh,
angla o Del,
ni xoxavav.
21 Pala kodoja gelem anθ-äl Thema le Sirǎqe haj le Ćilićǎqe.
22 Dar äl khangerǎ le Kristososqe
kaj si anθ-e Judeja
ïnkä ni dikhlesas man.
23 On numa aśundes:
„O manuś kaj phandelas amen
haj kerelas amenqe nasul,
akanak del duma anθa o pakjamos,
kaj maj anglal kamelas te stïrpil les.”
24 Haj on barǎrenas le Devles
anθa mïrï kauza.