Galateni 4

1 Me phenav kä kabor timpo

äk mośtenitori si ćhavoro,

ku sǎ kä si lesqe saorä bukǎ,

naj diferime kaθar äk robo.

2 Si anθ-e griźa le manuśänqi

kaj dikhen lesθar

haj i kaθar lesqe bukǎ,

ʒi k-e vremja kaj phendǎs lan lesqo dad.

3 Sa kadǎ i ame

kana sǎmas ćhavorä,

sǎmas robi

le sikaimatenqe äl phurane le lumǎqe.

4 Dar kana pherdilis e vremja,

o Del dinǎs drom pe Ćhaves,

kerdo anθa ʒuvlǎθe

haj biando talaj Kris,

5 te pokinel anθa pire

kola kaj beśen talaj Kris,

kadǎ te kerel amen ćave le Devlesqe.

6 Haj kä sen ćave le Devlesqe,

o Del dinǎs drom o Duxo pe Ćhavesqo

anθä amare ile,

kaj del muj:

„Abba!”

„Dadǃe!”

7 Kadǎ kä ni maj san robo,

san ćhavo le Devlesqo,

haj kana san lesqo ćhavo,

san i lesqo mośtenitori.

Te ïnkǎren tumari libertatja!

E dragostja le Pavelosqi karing äl galateni

8 Kana ni prinʒanden le Devles,

senas robi kolenqe

kaj on naj devlǃa ćaće.

9 Dar akanak päće prinʒanden le Devles,

sau maj miśto phendo,

pala sosθe senas prinʒande kaθar o Del,

sar maj bolden tumen palpale

k-äl sikaimata äl phurane,

kaj si khanćivale haj ćorä?

Kamen pale te sluźin lenqe sar robi?

10 Tume ïnkǎren gesa,

ćhona,

gesa bare,

haj bärśa.

11 Me darav anθa tumenθe

kä kerdem tumenqe buki anθa khanćesθe!

12 Kadǎ phralaǃle haj phejaǃle,

rugiv tumen śukar te aven sar manθe,

kä i me sem sar tumenθe.

Ni kerden manqe nić äk nasulimos.

13 Tume ʒanen kä anglal

anθa-i kauza mïrä nasfalimasqi

me phendem tumenqe e evangelia.

14 Sas pharo te dikhen muro trupo,

dar ni dikhlen man nasul

haj ni ćungarden man,

haj dikhlen man sar äk ïnʒero le Devlesqo,

sar le Kristosos Isus.

15 Deć,

kaj si tumari bukuria?

Kä phenav tumenqe so dikhlem,

kä te daśtisajlenas,

ïnkaladenas i tumare jakha

te den len manqe.

16 Kerdinǎjlem tumaro duśmano,

kä phendem tumenqe o ćaćimos?

17 Na gïndoça laćho roden tumen on

kaśte aven lença,

dar kamen te durǎren tumen amenθar,

ka tume len te roden len.

18 Si miśto te roden o miśtimos ïntotdjauna,

na numa kana me sem tumença.

19 Mïrä ćave,

anθa save pale liles man

äl dukha le kerimaske,

ʒi kana o Kristos dikhǒla anθä tumenθe,

20 te daśtivas akanak te avav tumença,

haj te paruav muro glaso!

Ni ʒanav so te maj pakǎv anθa tumenθe!

Duj ʒuvlǎ sikavel amenqe e Kris haj e fägäduinca

21 Phenen manqe tume

kaj kamen te aven talaj Kris,

ni aśunden so phenel e Kris?

22 Kä si ramome anθ-e Kris

kä le Avraamos sas les duj ćave,

jekh anθa-i roaba

haj jekh anθa-i ʒuvli slobodo.

23 Kova kaj kerdilos anθa-i roaba

sas kerdo sar orso ćhavo,

dar kova anθa-i ʒuvli slobodo

sas kerdo anθa-i fägäduinca

kerdi kaθar o Del.

24 Kadal bukǎ daśtin

te aven lile anθä aver felo.

Kadala si duj phanglimata:

jekh pa o Plaj Sinaj,

kaj kerel ćave te aven robi,

kadaja si e Agar.

25 E Agar si sar o Plaj Sinaj anθa-i Arabia,

haj sar o Jerusalimo kaj si akanak,

kä si anθ-e robia anθ-äk than pe ćhavença.

26 Dar o Jerusalimo anθa o ćeri

si slobodo haj si amari dej.

27 Kä si ramome:

„Bukurisao tu stjarpo,

ku sǎ kä ni daśtis te avel tut ćave!

De muj haj zbärisar dä bukurě,

ku sǎ kä ni ʒanes äl dukha le kerimaske!

Kä tut,

kaj san mukli,

si te avel tut maj but ćave

dä sar kola kaj si lan rrom.”

28 Kadǎ phralaǃle haj phejaǃle,

tume,

sar sas o Isak,

sen äl ćave fägäduime kaθar o Del.

29 Dar sar atunć,

kova kaj sas kerdo sar orso ćhavo,

kerelas nasul kolesqe kaj kerdilos anθa o Duxo.

Sa kadǎ si i akanak.

30 Dar so phenel e Skriptura?

„Gonisar lan kadala roaba haj i laqe ćhaves,

kä o ćhavo le roabaqo

naj te avel les rig anθ-e mośtenirja

le ćhaveça le ʒuvlǎqo slobodo.”^a

31 Kodolasqe phralaǃle haj phejaǃle,

ame ni sǎm äl ćave le roabaqe,

haj sǎm äl ćave le ʒuvlǎqe kaj si slobodo.