🏠 <     Alfabeto le literasa „c”     Alfabeto le literasa „k”
  <     Galateni     5     >  
5
1 O Kristos dinǎs amaro drom te avas slobozi,
kadǎ aćhon zurale,
haj na maj bangǒn pale
tala o źugo le robǎqo.
O ćhinimos tele kerel tut robo le Krisaqo
2 Aśunen,
me o Pavelo phenav tumenqe,
kana ćhinen tumen tele,
o Kristos naj te maj avel tumenqe laćho kathinende.
3 Me ʒanav so phenav,
haj maj phenav orso manuśäsqe
kaj mukel pes te avel ćhindo tele,
träbul te kerel sǎ so phenel e Kris.
4 Sen dur kaθar o Kristos,
tume kaj kamen te phenel o Del
kä sen ćaće anθa-i Kris,
haj pelen anθa o miśtimos le Devlesqo.
5 Kä ame abja aźukǎras,
kaj i ʒanas kaθar o Duxo,
kä o Del si te kerel amen ćaće
pentrukä ame pakǎs.
6 Kä anθ-o Kristos Isus
nić o ćhinimos tele,
nić o bićhinimos tele naj khanć,
haj numa o pakjamos
kaj sikadǒl anθ-e dragostja.
7 Tume ʒanas miśto!
Kon thardǎs tumen
te na pakǎn o ćaćimos?
8 Kadav tharimos
naj kaθar kova kaj del tumen muj.
9 Äk cïra droźdia
kerel te barǒl saorä aluato.
10 Pakǎv anθ-o Raj
kä ni gïndin anθä aver felo
sar me sikadem tumen.
Haj kodova kaj rimol tumen
si te lel pi pokin,
orsavo si ov.
11 Me,
phralaǃle haj phejaǃle,
kana phenava
kä äl nǎmurh te ćhinen pes tele,
sosθe maj sem naśado?
Atunć ni maj xolǎrelas kanikas o truśul.
12 Anθa kola kaj rimol tumen,
me kamav paśa o ćhinimos tele
on te kerdǒn i famenǎ!
Sar te trais anθ-o Duxo haj na anθ-e firja e bezexali
13 Dar tume,
phralaǃle haj phejaǃle,
senas dine muj kaθar o Del
te train anθ-e libertatja.
Dar ta na keren anθa-i kadaj libertatja
äk motivo te train anθa-i firja e bezexali!
Maj miśto sluźin tumenqe jekh avresqe
anθ-e dragostja!
14 Kä saorä Kris
si astardi anθä jekh porunka:
„Te jubis ke paśardes sar tu jubis tut”.a
15 Dar kana dandaren tumen
haj xan tumen ku sǎ jekh pä aver,
avel tumen griźa
ta na aven mudarde jekh avresθar!
16 Me phenav:
phiren anθ-o Duxo
ta na keren so kamel e firja bezexali!
17 Kä e firja bezexali
kamel kontra le Duxosqi
haj o Duxo kontra le firǎqi bezexali.
Kadala si kontra jekh avresqe,
kadǎ kä ni daśtin te keren so kamen.
18 Kana sen phirade kaθar o Duxo,
ni sen talaj Kris.
19 Äl bukǎ le firǎqe bezexali ʒanglon pes
haj si kadala:
soven avre ʒuvlǎnça sau murśänça
kaj naj lenqe,
keren bukǎ maxrime,
ni daśtin te oprin pe gïndurh äl nasul,
20 rugin pes kä aver devlǃa,
keren vräźitoria,
si lenqe xolǎ,
mardǒn,
si lenqe xoli p-äl bukǎ kaj naj lenqe,
cipin,
kamen numa anθa pesθe,
durǒn jekh avresθar,
xan pes,
21 kamen so si avresqe,
mudaren avren,
matǒn,
xan,
pen
haj kurvin maśkar pesθe,
haj keren aver bukǎ kaj amǎl kadalença.
Phenav tumenqe sar maj phendem,
kä kola kaj keren äl bukǎ kadala
naj te mośtenin o Thagarimos le Devlesqo.
22 Dar e roada le Duxosqi si:
e dragostja,
e bukuria,
e paćja,
te ïngǎres äl pharimata,
te keres o miśtimos,
o laćhimos,
te aves ćaćo,
23 o gogǎerimos,
o oprimos le poftenqo.
Naj kris kaj phenel
ta na keres kadal bukǎ.
24 Kon si le Kristososqo Isus
rästignisardǎs e firja bezexali
anθ-äk than soça kamel haj jubil oj.
25 Kana ame trais anθ-o Duxo
i te ʒas pala o Duxo.
26 Ta na avas barikane,
ta na xolǎras jekh avres,
haj ta na kamas so si avresqe.